【名家投稿】夠鐘救市 (上車樓)

作者:

2022-09-19

-廣告-

推薦文章：【7月5日更新】每週銀行按揭利率和按揭回贈比較

一個月前寫了一篇救市的可行方案，當時的反應仲係市場調整健康，購買力仍然不斷；到今時今日加息仲有餘力，甚至係越嚟越大力，細價單棟樓樓梯級式減價，逐漸蔓延到去傳統屋苑，如果再唔救市相信下個月就會蔓延到半新樓甚至人氣皇牌屋苑。簡單形容宜家買樓隨時係年頭嘅85折甚至8折，趨勢將會變成8折甚至75折。之前用兩成首期上車嘅朋友將會面對負資產嘅壓力，雖然短期內睇唔到銀行有需要call loan，但係加息加埋樓價下跌，對辛苦置業，選擇留在香港拼搏嘅朋友，係一個非常壞嘅訊息。他們原本因波叔plan降低門檻，下定決心上車，現在出事了政府卻視而不見，可能寧願壯士斷臂選擇移民到成本比較低的地方，也好過努力供款去維持負資產。

政府需要積極面對

如果政府到現在都唔放寬樓市調控措施，佛系相信市場可以自行調節，很可能會帶來災難級嘅後果。買家從價印花稅、非香港買家辣招印花稅等等其實已經不合時宜，現在需要外來人口補充香港移民的缺口，無論人才和錢財也需要，要吸引其他地方嘅朋友定居香港，移民政策置業政策必須配合現況改變，不可能再堅持不合時宜的政策。

切勿為打擊而打擊樓價

筆者聽到一些聲音，指樓價下跌更加幫助上車的朋友，但現實係唔係咁樣?根據這10多年嘅經驗，樓價跌，想買樓上車嘅朋友更加持觀望態度，必須要先清楚這批置業人士嘅剛性需求，他們有居住需要，同時也想樓價升值，就算跌到可負擔範圍，都會仍然係覺得低處未算低，如果政府為這些樓價多平多貴也不會買樓的朋友考慮房屋政策，倒不如增加公營房屋，靈活現在公營房屋機制，甚至更加活化白居二市場，尤其在購買資格上。所以，政府最迫切要做嘅事情是要維持樓價、金融體系穩定。

政府主導還息不還本

上月文章並沒有提及，現在也有個別大銀行還有「還息不還本」這個選項，但倒不如由政府主導，以擔保、免審批形式，容許業主還息不還本，為期兩年甚至三年，讓業主得以喘息，度過加息周期。大家都知道美國今次瘋狂加息係為遏制通脹，亦都會預視到持續落去環球經濟將會有災難性情況，所以這個周期必須要穩住樓價穩住經濟。現在香港嘅國際金融中心地位有所動搖，防疫政策兩邊不是人，在國家位置亦需要重新定位，除了是人民幣離岸中心之外，還要繼續成為國企集資中心交易中心，期間市場金融體系必須要穩定和集中資源去再發揚光大。

如果不幸政府選擇繼續佛系，將會令市民懷疑其管治能力，甚至引起更大社會矛盾。既然在升市期間政府可以出招調控，在肚瀉式下跌嘅時候也需要果斷下藥。香港經歷社會事件、疫情和移民潮，已經受到相當程度的創傷，需要在復原期間重拾國際金融中心地位，並加強香港在國家中的角色，金融體系絕不可以在這個時候受到更大傷害。

上車樓

作者所有文章

如對本文章有任何問題或意見，歡迎按右上角 Whatsapp 按鈕聯絡我們互相交流。