【名家投稿】朱古力與糞便

作者:

-

2019-01-08

-廣告-

推薦文章：【7月5日更新】每週銀行按揭利率和按揭回贈比較

一睇題目都覺得好核突，筆者反而覺得呢個係絕配，朱古力同糞便往往係一對，因為賺錢同投資往往都係咁，個個都想食朱古力，但係永遠唔會在意要搵錢嘅世界，朱古力永遠往往放喺糞便嘅附近，甚至溝埋一齊，朱古力就係投資嘅回報，糞便就係風險，朱古力大舊糞便都會相應大舊，但香港人往往比較大貪，比較喜歡朱古力面的糞便，如果唔係都唔會咁多苦主大聯盟，要勞煩專貴嘅議員陪同去備案。

分辨朱古力與糞便

糞便的包裝往往美輪美奐，甚至係五光十色，加上電視媒體嘅渲染，同人講佢嘅本質係糞便冇人相信，而投資者往往慣咗用肉眼去分，簡單講純粹睇外面同包裝，結果通常都會中招，甚至墮入騙局領略什麼東西叫做有風險無回報，要分辨呢兩樣嘢其實都係靠知識和勤力，同埋知道對方係點樣搵食，避開啲冇可可成份嘅糞便朱古力, 就算再保守嘅投資都好過食呢啲。

要食朱古力先要知道糞便的味道

有投資就有風險, 有朱古力同時也有糞便, 投資係冇可能完全避開曬糞便, 但係精靈嘅投資者, 最基本會避開冇可可成分嘅糞便朱古力, 跟住再尋找朱古力成份比較高但糞便是可控制範圍嘅投資項目，簡單講越傳統嘅投資項目，糞便嘅成份會比較少，朱古力表面會冇咁吸引，想食多啲朱古力，唯有好好善用貸款，寧願買多幾舊可可成分高嘅朱古力，都唔想買一嚿冇可可成份嘅100%糞便，呢個係物業投資者嘅原則。

防腐劑和香料

冇乜可可成分嘅朱古力，但糞便成份多多的，自然要落重防腐劑同香料，呢類防腐劑同香料類似保證回報，透過定期把少少有可可嘅朱古力畀投資者，在保質期後投資者才發現呢一嚿朱古力大部分都係糞便，就算僥幸能夠脫手，能夠拿回來的只有朱古力的成分，所謂投降輸一半，呢類項目可能一半都冇，因為商人純粹賣朱古力的利潤太少，不如加重糞便包裝為一大嚿朱古力，再加重防腐劑同香料，加上代言人發功，總有投資者會中。

投資係冇食物標籤

一般回報嘅投資係滿足唔到香港嘅投資者，呢個係事實，市場上都多咗好多新嘅投資產物，但唔會有食物標籤話畀你聽，呢一啲投資項目朱古力同糞便嘅比重係幾多，而香港人通常都自認醒到震，往往會諗住自己可以食最多嘅朱古力但避開曬所有糞便，呢個諗法往往係最危險。但既然知道呢兩樣嘢係一對嘅時候，食朱古力同時準備應對糞便，做好風險管理，雖然往往唔能夠贏盡，但久而久之最後勝利嘅往往都係佢地。

上車樓

如對本文章有任何問題或意見，歡迎按右上角 Whatsapp 按鈕聯絡我們互相交流。