按揭

18年5月1日後，唔用東亞可以用邊張信用卡交差餉地租有著數。

作者:

Skywalker

2018-05-01

-廣告-

推薦文章：【7月5日更新】每週銀行按揭利率和按揭回贈比較

好多朋友睇到我上一篇報導話今季係最後一季用東亞信用卡交差餉地租有分之後，都追問我到底之後用邊張信用卡依然有著數。

其實我唔係咁想講嘅。因為擔心見光死。咁辛苦去搞信用卡申請，但因為個優惠曝光太高、太多人用而無咗，你話情何以堪。

經過一輪思想爭扎，最後響星之谷老細Raymond的威逼利誘下，我都係決定要寫:

一般而言，信用卡繳費儲積分最先考慮用信用卡自動轉賬、又或者用戶親身以信用卡即場繳費，咁做依然可以賺獎分或現金回贈。但係交差餉地租，係唔接受信用卡自動轉賬，唯有用網上銀行繳費。不過，家陣大部份銀行嘅網上銀行繳費，係冇獎分或者現金回贈攞的。東亞信用卡亦都響5月1日起取消咗網上繳費的獎分。

咁有冇其他信用卡可以代替呢？答案係有嘅。不過，咁就要睇吓你想要現金回贈定係獎分（用來換飛行里數）。今日先講現金回贈。

ICBC宇宙星座

網上繳費重有現金回贈嘅信用卡唔多。但我只推介兩張：工銀亞洲嘅「ICBC宇宙星座 Visa Signature卡」、同埋「ICBC宇宙星座銀聯雙幣鑽石卡」。原因好簡單，佢有不設回贈上限嘅本地及海外簽賬消費1.5%現金回贈，重每月免費自動兌換現金回贈。呢兩張卡我之前講過，可參考番呢篇（https://goo.gl/umPXpz）。

你可能話：「唔係喎，個網頁明明話簽賬獎賞不適用於交稅。」冇錯，係唔適用交稅。不過我問過工銀亞洲信用卡電話中心，佢哋話交差餉地租不屬交稅交易類別，重確認埋交差餉地租係合資格交易攞簽賬獎賞添。當然，最終條款都係要跟銀行最新規定。

咁你可能會問，咁獎分換里數又點？呢兩張卡幫你唔到，但依然有其他卡做到。邊張？

認真講，依然可以用網上ebanking繳費既方式交差餉地租，重依然有獎分嘅信用卡真係一隻手數晒。我向來都只會介紹我認為最好嘅選擇，今次依然唔例外。

建行(亞洲)Visa Infinite

如果你係高流動資產人仕，你可以考慮建行(亞洲)Visa Infinite信用卡。首先呢張信用卡，積分不設期限，簽賬HK$1=1分，而8分＝1「亞洲萬里通」里數。我已經問過該行，差餉地租係合資格交易類別攞獎分。

不過，用呢張卡要注意兩點，第一：建行信用卡每年度無論係繳交保險公司之任何費用及網上繳費交易所累積的積分上限，合共為信用卡賬戶獲批核之最新信用額（並不適用於臨時加額之信用額）之12倍，響呢個限額以內嘅繳費先有積分賺。第二，建行(亞洲)Visa Infinite信用卡係專為該行「貴賓晉裕」/「貴賓理財」/「私人銀行」客戶而設，普通客戶冇得申請；而「貴賓晉裕」及「貴賓理財」每日平均合併結餘所要求的最低款額分別為港元HK$5百萬及HK$1百萬。

冇咁多錢開呢隻「貴賓晉裕」/「貴賓理財」戶口嘅朋友，又有咩嘢選擇呢?