【名家投稿】《飛魚‧論語》塘水滾塘魚

非魚論語 塘水滾塘魚
-廣告-

香港流傳著不少歇後語,都是老一輩口傳,能搭上歇後語的,相信都已年屆中年。過往的電影,如許氏兄弟的喜劇,都會對應場景加入歇後語,那一代人明白箇中意義自然會心微笑。近年的電視、電影就鮮有提及歇後語,年輕觀眾不明所以,硬生砌入對白亦感覺相當「突兀」。在職場上,某某同事如突然說句歇後語,大家甚至會覺得相當「老土」。

事實上,歇後語就如古代的成語,一組字詞或句子,當中已包含了一個道理甚至一個故事。年青、年幼一輩,如果父母沒有傳承,香港的歇後語很可能在這一代失傳了。

為方便向下一代傳承,筆者嘗試整理一些成語或歇後語,並且用口語寫出來,讓大家容易向下一代分享。本網站主題是財經、樓巿為主,筆者就先以這類型歇後語開始,之後可能會介紹一些相關成語。

《塘水滾塘魚》

字面意思:

喺呢度嘅「滾」字,喺廣東話意思即係將水煲熱。成句意思即係用魚塘入面嘅水,用嚟煮熟魚塘入面嘅魚。

藏詞(比譬):

喺故事層面上,《塘水滾塘魚》同成語《煮豆燃萁》類似,豆萁即係豆嘅莖部,《煮豆燃萁》即係燒啲豆萁去煮熟鍋入面嘅豆。通常係形容朋友、親人間互相傷害,形成一個雙輸嘅局面。

而《塘水滾塘魚》,指嘅係啲魚生活喺魚塘,靠魚塘入面嘅水同營養長大,而家將嗰個魚塘嘅水用嚟煮番入面養大嘅魚,即係來來去去都係同一堆野(養份),無其他額外既營養。《塘水滾塘魚》通常係指喺商業或經濟上,無外來嘅資金同投資者,只靠同一班人嘅資金喺同一個巿場入面進行交易(或炒作),唔會有實際利潤、增長或經濟效益。

例子:

就以近日香港樓巿做例子,香港住宅樓巿喺過去廿年,爆發式咁增值。除咗人口增長導致住宅需求大增外,低息環境導致香港以外地區資金湧入亦係一大原因。雖然話外地資金直接購買物業嘅比率不大,但購買其他金融產品例如股票等,直接引致股巿大升。香港巿民喺股巿有斬鑊時自然有資本買樓,亦是間接導致樓巿颷升嘅部份原因。

‹塘水›

對於樓巿來講,塘水可以有兩個解讀,一個係只計樓巿本身,另一個計法係香港整個投資巿場既資金。

喺樓價下跌前,租金回報率(未扣差餉及管理費等)已跌至2.5%或以下。但係自2022年底開始,銀行提供嘅定期存款利率已開始超過租金回報率。同時,買樓嘅按揭利息亦喺2022年中開始追過租金回報率。呢段期間,利息攀升,唔少人會考慮將資金泊喺定期,而唔會投資喺樓巿。對於樓巿來講,定期存款就係扯走樓巿塘水既重要因素。

相反,假如定期息率唔再吸引而流入樓巿,對樓巿來講可以理解為新增嘅水,可以令樓價水漲船高。但係要注意嘅係,有人買樓就有人賣樓,賣樓嘅人如果將啲資金放番出去定期或本港股巿,而唔係換樓嘅話,咁注入嚟嘅塘水,同流番出去嘅塘水份量一樣,對樓價上升係無幫助嘅。如果用樓巿+銀行存款一齊計嘅話,都係同一烹水。

但係假如啲人賣樓後,將手頭資金繼續買大啲買好啲,總不免要喺銀行借多啲錢。喺撤銷外地人買港樓嘅辣招後,都會有外地資金直接買香港樓。呢啲新增嘅資金就唔再係原本嘅塘水,而係新加到塘入面嘅水,所謂水漲船高,整體樓價就會上升。

‹塘魚›

除左塘水外,塘魚亦係影響樓巿嘅主要因素。對於樓巿來講,塘魚就係居住人口而導致嘅住屋需求。

近三、四年,疫情及移民潮影響之下,流動人口如外地派駐香港員工撤離,或者經常人口如本地居民移居海外,都導致住屋需求下降。另外,移民外地嘅人,唔少都會賣出香港物業,帶著資金去外國置業(同時流失塘水及塘魚)。移民客從香港樓巿抽出資金,相信亦係近年樓價下跌嘅主要原因。

譬如最熱門嘅英國BNO 移民,有統計指已超過16萬人,佔香港人口約2%。而一直以來,住宅空置率大致只係3.5%至4.5%左右,2%嘅人口遷出,對樓巿衝擊係幾大嘅。不過睇番差餉物業估價署嘅《香港物業報告》,私人住宅空置量升幅又無咁勁,一般都係5萬個左右(2019年45000個係近年特別低嘅一年),上年升到新高嘅近55000個,但都係講緊新增咗幾千個空置量。

塘魚流出,導致住屋需求下跌。想樓巿有起色,就要有新嘅魚加入。近年政府都出台咗幾個政策去增加人口,包括專才移民同投資移民,另外仲有引入新工種嘅外勞。唔好睇少外勞力量,新嘅外勞政策暫時預計有2萬個建造業同運輸業外外勞。呢批外勞嚟到香港都要搵地方住,就算僱主提供宿舍,環境再擠迫都好,點都造成新增嘅住屋需求。

呢啲新嘅魚,除咗造成新嘅住屋需求外,仲會唔會係《鯰魚效應》入面嘅鯰魚呢?不過呢個系列暫時只係講偈後語同成語,正式經濟學嘅Topic都係留番比讀者爬youtuber好啲。

飛魚子

作者過去文章:

bit.ly/2JJnk35

如對本文章有任何問題或意見,歡迎按右上角 Whatsapp 按鈕聯絡我們互相交流。

推薦文章:【每週更新】銀行按揭利率及按揭回贈比較  

推薦文章:2.45% 按揭、轉按現金回贈,誰與爭鋒!

 

想知邊間銀行按息最平,回贈最高? 請留言向我們索取最新情報

 
非香港號碼,先選區號。

請檢查電話號碼是否正確。


陳凱琳同苟姑娘教你如何選擇按揭中介:

關於我們

免費按揭轉介,幫客人格價和尋找最低利息、最高回贈的銀行,以及為客人解決按揭上的奇難雜症。我們不收取任何費用,只想把所識和所想,向客人分享。公司的獎項和里程碑: 詳情請瀏覽星之谷按揭轉介網頁:https://starpagency.com