【名家投稿】《飛魚‧論語》賊佬試砂煲

賊佬試砂煲
-廣告-

香港流傳著不少歇後語,都是老一輩口傳,事實上,歇後語就如古代的成語,一組字詞或句子,當中已包含了一個道理甚至一個故事。年輕、年幼一輩,如果父母沒有傳承,香港的歇後語很可能在這一代失傳了。

為方便向下一代傳承,筆者嘗試整理一些成語或歇後語,並且用口語寫出來,讓大家容易向下一代分享。本網站主題是財經、樓巿為主,筆者就先以這類型歇後語開始,之後可能會介紹一些相關成語。

賊佬試砂煲

字面意思:

賊佬即係盜賊,呢度是指爆竊入屋嗰種賊。砂煲係以前啲人用來煲藥嘅,或者係用來煮煲仔飯嘅陶製煲。煲中藥嗰啲砂煲個外觀黑蚊蚊(其實係深啡),整體比較圓近球形,個Size同人頭差唔多大。

藏詞(比譬):

以前啲人住喺平房,好多時都係得一層,啲賊要入屋就好容易,喺外面行人路或花園擒過隻窗就可以入屋偷野(爆格)。當然,想入屋偷嘢,通常就會揀半夜,同埋間屋熄晒燈、戶主訓晒覺先入去,神不知鬼不覺。

雖然係咁,如果一嘢就伸個頭入去隻窗度捐入屋,戶主咁啱喺度見到,就會一棍兜頭扑落嚟。由於砂煲個形狀同大細都似人頭,啲賊佬就會用支棍,叉住個砂煲、上面放塊布扮頭髮,喺窗隊入屋探一探先,萬一屋主喺度,都係扑爛個砂煲而唔係扑中自己個頭。

而家一般人都住高樓大廈,除非咁啱大維修搭晒棚,否則「窗外入屋」嘅竊賊唔多。而就算係有,擒上竹棚時帶埋支棍同砂煲都相當唔方便,應該都唔會再有賊用呢個方法。

「賊佬試砂煲水」喺而家嚟講,係形容啲人同其他人做生意或者買賣時,周圍還價試反應,同「博大霧」有異曲同工嘅意思。

例子:

啱啱一年前左右,樓巿忽然急凍,買家幾乎絕跡,如果有放過盤嘅業主或者有睇過樓嘅準買家,都應該feel 到個巿有幾淡。作為業主,無人約睇樓無人還價,自然就會心急,嘗試減價求售,放盤低過估價嘅比比皆是。

而買家方面,淡巿睇樓簡直係賓至如歸嘅享受,經紀難得收到個客,又唔係咁忙,隨時帶個客睇晒成個屋苑,甚至成區二、三十個盤都係等閒。好多客睇完,仍然覺得樓價太高而唔還價嘅大有人在。

而有心買嘅客,睇完咁多盤之後,心入面總會對每個盤有啲評分。質素較低嘅盤當然就想「賤價買入」,質素較高嘅盤都希望同質素低嘅樓「拉近啲距離」。至於睇中幾個質素差唔多嘅盤,最簡單嘅方法就係出一個低價,叫經紀問晒幾個業主,睇吓邊間肯落價match 下。呢個情況就係《賊佬試砂煲》。

撤辣後,報紙成日報導話一手成交大旺,但實際上,二手巿場其實都旺過之前好多,起碼多左買家還價,而唔係業主單方面捱打。仲有,啲地產經紀都唔會好似淡巿咁得閒,可以陪個客約睇二、三十個二手盤。呢刻要睇一堆盤然後還一堆價,去博某某盤業主心軟唔係咁容易喇。

所以呢,我成日都話,淡巿時就多睇樓,同埋了解下按揭點玩法。淡巿入到筍盤故然係好,就算入唔到筍盤,到個巿一轉旺嗰陣,有心水盤一放出來,自己睇過熟晒嘅,點都比其他人快啲還到個價,早著先機。

飛魚子

作者過去文章:

bit.ly/2JJnk35

如對本文章有任何問題或意見,歡迎按右上角 Whatsapp 按鈕聯絡我們互相交流。

推薦文章:【每週更新】銀行按揭利率及按揭回贈比較  

推薦文章:2.45% 按揭、轉按現金回贈,誰與爭鋒!

 

想知邊間銀行按息最平,回贈最高? 請留言向我們索取最新情報

 
非香港號碼,先選區號。

請檢查電話號碼是否正確。


陳凱琳同苟姑娘教你如何選擇按揭中介:

關於我們

免費按揭轉介,幫客人格價和尋找最低利息、最高回贈的銀行,以及為客人解決按揭上的奇難雜症。我們不收取任何費用,只想把所識和所想,向客人分享。公司的獎項和里程碑: 詳情請瀏覽星之谷按揭轉介網頁:https://starpagency.com